XUAN PUNTONA enfila pelo verde

Que la política y lo erótico nun tán riñíos ye dalgo que vemos, masque solo de xemes en cuando, pela piel d'esti país de nuestro que se llama Asturies. Prueba d'ello pue ser la ponencia que sobro la lliteratura erótica lleera David Rivas na Arribada 2006. Pola mor d'ella, y de la so preferencia poles tetines, ficiéron-y dos preguntes en dientro d'una entrevista entamada col motivu de la publicación de "Xente de perende", primer llibru relatos del dirixente nacionaliegu. Llibru ésti onde, mire usté, podemos topar les estayes correspondientes de narrativa verdurienta como nel casu, ente más otros, del cuentu númberu 73, ónde s'alluga la peripecia que monten unes bragues despistaes. Lo dicho, ehí va'l cachu entrevista.

A.E.: La so fras de les tetines diera muncho que falar.

D.M.R.: Eso díxilo na ponencia, nuna fras pente ventiún folios. Nel coloquiu de dempués falé d’otres coses erótiques más esplícites. Pero naide les recoyó. Mala suerte.

A.E.: Ye raro pa un políticu arriesgase a falar públicamente de delles coses fácilmente tracamundiables o de les que puen facer risión.

D.M.R.: Ye que yo nun soi un políticu nel sen d’esi profesional qu’anda midiendo cada pallabra que diz. Soi un profesor que, nesti momentu y nesta circunstancia, representa a la xente que camienta qu’Asturies entá pervive y que tien posibilidaes de xorrecer. Mañana dexaré de presentame a elecciones y seguiré siendo un profesor, un científicu. Y sobro l’erotismu, ¿qué-y voi dicir?. Prefiero un nacionalismu d’Eros qu’un nacionalismu de Thanatos. Prefiero vivir y dexar vivir na nación que morrer o matar por ella. Pero, pa que naide dulde de lo que digo: lo de les tetines ye verdá. Ya otra cosa: n’Andecha Astur naide nun dixo nada, magar que caún tien la so propia idega de les tetes y de les pirules.

http://www.infoasturies.net/archivu/12_06/rivas.htm