XUAN PUNTONA enfila pelo verde

Cuando se publicó la novela Emmanuelle, en 1959, na so cubierta nun apaecía'l nome del autor, fechu que diba iguase n'ediciones posteriores col usu d'un seudónimu, Emmanuelle Arsan, qu'amazcaraba a una de les escritores más atrevíes del sieglu XX. Falóse muncho dende entós y díxose que se podría tratar d'una moza tailandesa casada con un diplomáticu francés, que se valiera de les esperiencies de so pa escribir esti éxitu de la lliteratura erótica. Los años, de toes maneres, nun llograron descubrir la identidá de la autora de L'antivirxen o Los fíos d'Emmanuelle.

L'argumentu ye'l que sigue. Con diecinueve años y acabante casar con un prósperu inxenieru que vive en Bangkok, Emmanuelle viaxa a Tailandia pa reunise con él. La so relación afítase nuna rara confianza nel adulteriu y la promiscuidá; allí onde los celos xurden nel común les pareyes, esti matrimoniu descubre estímulos y escitación. Por embargu, y al pesar de la so formidable disposición pal sexu, ente momentos lésbicos y caldes duches, dalgo na alloriada vida amatoria d'Emmanuelle paez nun acabar de completase. Sedrá la muyer d'un conde francés quien suxera a la protagonista que pa vencer esi vaciu sexual tien de s'acostar con un noble que-y dobla la edá, Mario, un filántropu italianu que vien de va años percorriendo'l mundu, atropando disgresiones filosófiques qu'apuntalen el so pensamientu dionisíacu. Na llarga nueche del so alcuentru, dambos falarán sobro la redención sexual del individu y la trescendencia al traviés del sexu, nun camín ensin vuelta hacia los cumales del prestu.

En 2006 Círculo de Lectores, por cortesía de Tusquets Editores, editó una nueva traducción de la novela, obra de Carmen Artal, con un guapu diseñu d'Eva Mutter y una ilustracion de sobrecubierta de Lev Dogachov.